Lurta eftir FM1 og Voxpop á netinum

Fyrra FM-finalan: Mjølnir var mætari enn Fleyr

Mjølnir vann í gjárkvøldið tryggan 3-0 sigur á Fleyr í fyrru FM-finaluni í Føroya Tele-deildini við monnum

Mjølnir – Fleyr 3-0 (25-19, 25-20, 25-16)

Mjølnir vann í gjárkvøldið tryggan 3-0 sigur á Fleyr í fyrru FM-finaluni í Føroya Tele-deildini við monnum.

Eitt sindur av spenningi var í fyrsta setti, menn annars var Mjølnir nógv mætari á øllum økjum.

Liðini fylgdust til 18-18 í fyrsta setti, tá Mjølnir sleit seg leyst. Ein avgerandi støða var, tá Mjølnir við “pannukøkubjarging” at enda vann, at síggja til, vónleysa bóltin og gjørdi tað til 21-18, ístaðin fyri at Fleyr minkaði um munin til 20-19. Við blokki gjørdi Jóhan Arni Elisson Wang tað til 25-19.

Jóhan Arni var eisini øgiligur í blokkinum saman við hinum í øðrum setti, og tá Cristian Imhoff úr kroystum støðum kortini fekk langað bóltarnar í gólvið hjá Fleyr, so tóktist havnarliðið ikki at hava nakað aftursvar.

Mjølnir hevði átta dystarbóltar í triðja setti; Thorvald Danielsen gjørdi sær dælt av tí fyrsta við einum serviessi oman í krókin.

Seinna FM-finalan verður í høllini á Hálsi leygardagin 29. apríl kl. 17. Vinnur Mjølnir, so er Mjølnir føroyameistari. Vinnur Fleyr – sama hvat settmunurin er – so verður føroyameistaraheitið avgjørt við einum gullsetti upp í 15.

Klokkan 13 – sama dag og sama stað – spæla kvinnurnar hjá SÍ og Fleyr sína seinnu FM-finalu. SÍ vann ta fyrru í mikukvøldið, og tað merkir, at vinnur SÍ aftur leygardagin, so eru sørvingar føroyameistarar. Vinnur Fleyr – sama hvat settmunurin er – so verður føroyameistaraheitið avgjørt við einum gullsetti upp í 15.

Báðir dystirnir verða vístir á Rás1 í Televarpinum og verða stroymdir á https://sg.tv.fo/ras

Les eisini...  Sølvi fegnast um at vera á einum heiðursmerkjaplássi aftur

Niels Petersen verður frásøgumaður.