Lurta eftir FM1 og Voxpop á netinum

Vilja endurreisa gamla skúlan í Søldarfirði

500.000 krónur eru í ár settar av til at endurreisa gamla skúlan í Søldarfirði, men skúlin er í ringum standi. Borgarstjórin og formaðurin í mentanarnevndini vóru í gjár og skoðaðu skúlan

Tá Runavíkar býráð í fjør samtykti fíggjarætlanina fyri kommununa í ár, var ein partur av íløgunum settur av til at endurreisa gamla skúlan í Søldarfirði.

Gamli skúlin, sum í dag bert eru nakrar toftir, stendur nakað oman fyri bygdina, og skúlin varð vígdur 9. Desember í 1890.

Helgi Jacobsen hevur í verkinum av Tinghellu á Førjaklettin skrivað søguna um skúlarnar har um leiðir, og í verkinum verður skrivað, at 1. Oktober í 1956 varð nýggjur skúli tikin í nýtslu, og gamli skúlin oman fyri bygdina hevur síðan at kalla ongan góðan átt. Onkur roynd hevur verið gjørd hesi árini at bjarga skúlanum, hesar royndirnar eru ikki komnar á mál.

Runavíkar kommuna skrivar, at gjáramorgunin fóru Tórbjørn Jacobsen, borgarstjóri, og Petur Hansen, formaður í mentanarnevndini í Runavíkar kommunu, ein túr niðan til gamla bygdaskúlan, og við á ferðini var eisini Einar Toftegaard.

Endamálið við túrinum var at skoða skúlan, og sum myndirnar vísa, er skúlin ikki í góðum standi.

-So at siga allur norðurendin er rapaður, – kortini er suðurendin inntaktur og múrarnir eystur- og vestureftir somuleiðis. 500.000 krónur eru settar av í ár til endamálið at endurreisa skúlan, men nú skal ein meting gerast um hvat ið ber til og ikki.

-Einar hevur mált skúlan upp, og verður politiska niðurstøðan hon, at hann verður bøttur, skal tað eisini takast upp hvat ið hann kann brúkast til í nýggjum sniði, har treytaleys atlit kortini verða tikin til bygningin soleiðis, sum hann sá út í 1890 – fyri sløkum 123 árum síðan, sigur Runavíkar kommuna.

Les eisini...  Fjølbroyttur 10’ari í tveir tímar fyrrapartin mánadagin

Framvegis eru fleiri praktiskir spurningar ósvaraðir, millum annað um jørð og atkomu, men kommunan sigur, at meira verður at frætta um málið sum frálíður.

Petur Hansen, formaður í mentanarnevndini, og Tórbjørn Jacobsen, borgarstjóri, vóru í gjár á vitjan í toftunum. Mynd: Runavíkar kommuna