Erling Braut Haaland hevur higartil skotið 35 landskappingarmál fyri Manchester City, men 5. mai 1928 skoraði Dixie Dean hjá Everton eitt hattrikk ímóti Arsenal og kom tá upp á heili 60 mál í landskappingini – og tað er framvegis met. Harafturat skoraði Dean trý mál í FA Cuppini. Verða allir dystir í kappingarárinum taldir við, skoraði hann samanlagt heili 82 mál.
Árið fyri skoraði George Camsell ikki færri enn 59 mál í landskappingini fyri Middlesbrough og tey fægstu munnu hava ivast í, at metið fór at halda í allar ævir. Í veruleikanum helt metið bara eitt kappingarár, áðrenn William Ralph Dean – Dixie Dean – tók tað. Lætt var tað ikki, tí tá tveir dystir vóru eftir, manglaði hann sjey mál fyri at taka metið. Hann skoraði fýra av málunum ímóti Burnley í næstseinasta dystinum. Leygardagin 5. mai 1927 komu 48.715 fjepparar saman á Goodison fyri at heilsa nýkrýnda meistaranum og síggja Dean skora eitt hattrikk fyri at taka metið frá Camsell. Arsenal legði seg á odda eftir tveir minuttir – Dean javnaði minuttin aftaná. Í 6. minutti varð brotsspark gjørt ímóti Dean og hann skeyt sjálvur brotssparkið í mál. Hann hevði nú javnað metið og hevði ríkiligt av tíð at taka metið, men tað var ikki fyrr enn 8 minuttir vóru eftir av vanligu leiktíðini, at Alec Trup sendi eitt hornaspark inn fyri til Dean, sum skallaði bóltin í mál og skoraði samstundis 60. málið í kappingarárinum.
Dixie Dean hjá Everton var heilt framúrskarandi sum miðframherji og álopsmál, serliga orsakað av frálíka høvuðspælinum (hóast hann bara var 1,78 metrar) í 1920-árunum og 1930-árunum. Hann varð verandi á Goodison til kappingarárið 1937-38, har hann skoraði heili 349 mál í 399 landskappingardystum. Samanlagt skoraði Dean 379 mál í 438 landskappingardystum. Tað er bara Arthur Rowley, sum hevur skotið fleiri mál í landskappingini; hann skoraði 434 mál í 619 landskappingardystum. Dixie Dean doyði 1. mars 1980, meðan hann var til dyst millum Everton og Liverpool.