Í byrjanini av 2022 vóru 603 el-bilar skrásettir í Føroyum. Tá vit komu inn í hetta árið var talið næstan tvífaldað til 1.106 el-bilar, so ikki annað kann sigast, at sølan av el-bilum hevur rættiliga tikið dik á seg hesa seinastu tíðina.
Til samanberingar kann sigast, at fyri tíggju árum síðan vóru bert tríggir av gott 20.000 persónbilunum í Føroyum el-drivnir. Í 2019 vóru el-bilarnir komnir upp á 99, og fyrst í hesum árinum er talið altso komið upp á 1.106 el-bilar.
Tað skrivar heimasíðan hjá Vinnuhúsinum.
Skrásettir el-bilar síðan 2012
Tøknilig menning og størri útboð sett fer á søluna av el-bilum
Mett verður, at tøkniliga menningin er ein av fremstu orsøkunum, hví fleiri el-bilar verða keyptir í dag, enn fyri nøkrum árum síðan. Eisini eru battaríini vorðin betri, so til ber nú at koyra millum 300 og 400 kilometrar upp á eina løðing.
Seinastu árini eru eisini alsamt fleiri el-bilar komnir á marknaðin, og tí væntar Vinnuhúsið, at hendan gongdin fer at halda fram, tá ið triði hvør persónbilur í Føroyum um fimm ár verður ein el-bilur.
Skjótt vaksandi talið av el-bilum fer at seta stór krøv til útbygging av infrakervinum við løðistøðum til el-bilar, kring alt landið, hesa komandi tíðina, og tí væntar Vinnuhúsið, at tað verður stórur tørvur á fleiri el-løðistøðum komandi tíðina.
Kelda: Vinnuhúsið
